لا وطن للاحرار في دنيا العبيد

عزيزى الاخوانجى ، أو مش اخوانجى بس بتحبهم أو مش مع مرسى بس مؤيد للشرعية .
احنا متفقين ان الدم كله حرام .. بس انت مش ملاحظ ردة فعل الناس التانية فيها برود ولا مبالاة ليه ؟

فاكر لما كنا بنهتف يسقط يسقط حكم العسكر واحنا كنا بنقصد المجلس العسكرى بصفته السياسية كنت انت بتقول ايه ؟ افكرك عشان ممكن يكون جالك زهايمر
كانت الاخوان والسلفيين بتحشد ليوم 27 مايو فى ميدان التحرير وبيهتفوا " دقن وجلابية ..العسكر مية مية و " يا مشير يا مشير من النهارده انت الامير "

افتكرت ؟ لا ؟ طيب فاكر احداث محمد محمود ؟ فاكر لما الناس نزلت فى الشارع تطالب باسقاط حكم العسكر لتجاوزاته السياسية الفاشلة ؟ فاكر دم الناس اللى ماتت اللى كان مغرق الارصفة والشوارع ؟ فاكر عملت ايه ؟ قولت مفيش خرطوش .. وقولت ان الداخلية اتغيرت وبطلت تضرب خرطوش حتى برلمان العار بتاعكم قال وزير الداخلية بيؤكد ان مفيش خرطوش .. وهات يا تسقيف تحت القبة الوسخة اللى انت كنت تحتها ..

طيب فاكر لما مات مينا دانيال وعماد عفت ؟ فاكر اتقال ان اللى قتلوهم جوة الميدان وان المتظاهرين بيحاولوا يستميلوا عطف الناس وان احنا ( اللى بنموت ) بنفسد العرص الديموقراطى بتاع بديعه بتاعتكم .
فاكر لما جبتوا وزير الداخلية فى مجلس الشعب واحتفلتوا بيه والراجل داخلكم بخرطوش فى ايده واحده مضروبة والتانية لا .
بمناسبة اللى احنا فيه واكيد انت شايف كلمة هم ايه اللى وداهم هناك ؟ اقولك انا اصلها .. اصلها لما بنت جدعه شافت الظلم والاصابات والغاز والخرطوش كتير .. نزلت تمرض الناس .. اتضربت واتسحلت واتعرت من عسكرى مخه اتغسل من وساختكم الاعلامية ومن المجلس العسكرى معدوم الضمير وبمباركة الاوساخ اللى وصلوا لسدة الحكم فى وقتها واتقال الله هو ايه اللى وداها هناك ، وطلعت نعجة اخوانجية تقول الله هى مش ليها راجل يدافع عنها ، وطلع الديوث اللى اسمه خائض عبد الله يقول للراجل اللى زعلان لما شافها ياواد يا مؤمن ! وقالك اصلها كنت متمرمغة فى الارض واستفزت الجنود .. والله واحشتنى يا خائض ( يا واد يا وسخ )
فاكر علاء عبد الهادى وعماد عفت ومينا دانيال ماتوا ازاى وامتى ؟
فاكر الشاب اللى اسمه اسلام ومات بطلقة فى بطنه ؟
فاكر لما حاصرتم المحكمة الدستورية العليا وقعدتوا تهتفوا الشعب والشرطة ايه واحده الشعب والشرطة ايد واحده ..
فاكر لما كانوا اوسخ ممثلين ليكم بيقولوا ان خيام التحرير مليانه دعارة وان البنات بتروح هناك عشان يتم التحرش بيهم وان فيه حبوب منع الحمل ( وواقى ذكرى ) موجود داخل الخيام عشان يتم ممارسة العلاقات الجنسية كاملة .. اصلهم شباب وبنات ملهومش أهل .
فاكر التراامدول و ال200 جنيه وجبة الكنتاكى ودول شوية بلطجية مأجورين ..
فاكر ان الست عورة وصوتها عورة وايه اللى بينزلها فاكر الطعن فى نسائنا وفتياتنا كان عامل ازاى ..

فاكر ان لازم الثوار يتعلقوا على باب المساجد ويبقوا عبرة " الشيخ المناضل عبد الله بدر "

فاكر خالد عبد الله لما قال ايه يعنى لما يموت مليون واحد عشان 90 مليون يعيشوا ؟

فاكر قتلاهم فى النار وقتلانا فى الجنه ؟

فاكر اللى مش عاجبه يروح كندا ؟

إوعى تكون فاكر ان هقولك فى الأخر انى رغم كل ده هقف معاك .. تبقى بتحلم ساعتها .. انا بس زعلان على اللى بيموت منك وقياداتكم قاعدة تحت التكييف باللباس والفانلة وانت بيتضحى بيك كالخروف

ايوه انت ...

بديع ... والخرفاااااان

ايوه انت ...

انا معنديش مشكلة انك توصف خطاب السيسي بالتحريضي بس عندي مشكلة انك تنكر ان كل خطابات الاخوان وحلفاءهم تحريضية.

ومعنديش مشكلة انك تقول ان عدلي منصور طرطور والسيسي اللي ممشيه بس عندي مشكلة انك تطالب بعودة "مرسي" اللي سبحان الله كان مكتب الارشاد ممشيه، علي اساس ان عدلي منصور ده طرطور و مرسي ده الوينج اليمين في بترول اسيوط.

معنديش مشكلة انه يكون "الدم كله حرام" بس عندي مشكلة لما الجملة دي تطلع بعد سقوط ضحايا من الاخوان بس علي اساس ان اللي بيسيل من الاخوان دم واللي بيسيل من اي شخص تاني ده بلح باللبن.

معنديش مشكلة في اعتراضك علي "تفويض السيسي" في مواجهة "الارهابيين" بس عندي مشكلة مع "كلنا مع القرار" و "اضرب بيد من حديد يا ريس" لما كانت في مواجهة "المعارضين" مش حتي الارهابيين.

معنديش مشكلة ان قطع الطرق بقي انهاردة حق ليك كا متظاهر سلمي بس عندي مشكلة انه من شهر واحد بس كان بلطجة ويجب التعامل معاه بكل حسم وقوة.

معنديش مشكلة انك تتضايق من تهليل الناس للسيسي بعد "خطابة التحريضي" -علي حد كلامك- بس عندي مشكلة ان تهليلك انت للشيوخ اللي استباحوا دم الناس اللي نازلة يوم 30 ومباركة رئيسك للكلام ده يبقي عادي.

معنديش اي مشكلة انك تشل البلد كلها بكل المصالح والطرق اللي فيها وتهدد بالتصعيد لعصيان مدني بس عندي مشكلة مع "شغلونا مكانهم" "ونشتغل وقت زيادة" وقت ما كنت بتقسم التورتة مع العسكر والناس بتموت.

معنديش مشكلة انكم تسنتجدوا بينا مع ان اول ناس بعتوهم كانوا احنا .. معنديش مشكلة في ازدواجيتك وكذبك وتبريرك وتدليسك اطلاقا ..انا

معنديش مشكلة معاك يا عم .. انت المشكلة .!

حصاد الاخوان الظالمون منذ الثورة ...

من قال نؤيد ترشيح الرئيس مبارك وأتمنى الجلوس معه ؟!
من قال مبارك والد لكل المصريين ؟!
من صرح بأنه لن يشارك فى مظاهرات 25 يناير ونرفع 10 مطالب للنظام لتهدئة الشارع ؟!
من بعدما وجد كفة الثورة راجحة قرر المشاركة فيها ؟!
من أول من جلس مع عمر سليمان للمساومة والخروج بأكثر مكاسب ممكنة ؟!
من أول من قال الجيش والشعب ايد واحدة ؟!
من أول من رحب بتكليف مبارك للمجلس العسكرى بتولى الحكم ؟!
من أول من ترك الميدان ؟!
من أول من هتف " الشعب يريد إخلاء الميدان" ؟!
من قال أن المجلس العسكرى هو عمود الخيمة وضمان لاستقرار البلاد ؟!
من دافع بإستماتة عن المجلس العسكرى ؟!
من الذى رشح عصام شرف لتولى رئاسة الوزراء ؟!
من الذى أيد عصام شرف وادعى بأنه شارك فى الثورة ؟!
من الذى لمع عصام شرف ؟!
من الذى كان مع عصام شرف فى الميدان على المنصة وكان يشير لأتباعه بالتصقيف؟!
من الذى حمل عصام شرف على الأعناق وجعل الثوار يحملونه معه ؟!
من شارك فى لجنة صياغة التعديلات الدستورية ؟!
من وجه الناس بنعم لنصرة الدين ودخول الجنة والاستقرار وأن لا لتنصير الدولة ودخول النار ؟!
من دفن الثورة بالترقيعات الدستورية ؟!
من وافق على الإعلان الدستوري الأول المخالف لنتيجة الاستفتاء وقال على الإعلان –الغير- الدستورى أنه الشرعية ورأى الشعب ؟!
من هاجم معارضى الإعلان –الغير- دستورى الأول واتهموهم بالانقلاب على الشرعية ؟!
من الذى أعطى الشرعية للمجلس العسكرى ؟!
من قابل السفيرة الأمريكية وجون ماكين فى مقر حزبه وكرمه ؟!
من اتهم معتصمى مارس بأنهم بلطجية ؟!
من قام بعمل يوم اليتيم لكى لا يشارك فى جمعه أول أبريل ؟!
من صور موقعه صور الميدان عند الشروق ليقول أن الميدان خالى ؟!
من بلّغ عن ضباط 8 أبريل بعد أن شاهد كارنيهاتهم ؟!
من قال "الجيش والشعب يد واحدة " ؟!
من الذى رفض الدستور أولا؟!
من اتهم الثوار بالوقيعة بين الشعب والجيش ؟!
من اتهم الثوار بأنهم عملاء المخلوع والكفرة الملاحدة الزناديق ؟!
من طلب من العسكرى فض اعتصام الميدان وأيد الفض فى أول رمضان ؟!
من غض الطرف عن مجزره ماسبيرو واتهم الأقباط بحمل الأسلحة والتعدى على الجيش ؟!
من اتهم الثوار بأنهم "عيال صايعة " وبلطجية مأجورين ؟!
من اتهم الثوار بأنهم يريدون إفساد العرس الديمقراطى ؟!
من دعا لمليونية إنقاذ القدس للتغطية على مليونية التحرير ؟!
من ترك الثوار يُزبحون وتلقى جثثهم فى الزبالة ؟!
من روج للخروج الآمن للمجلس العسكرى ؟!
من قال أنه سيترشح على 40 % ثم 50 % ثم 60 % وترشح فى النهاية على كل مقاعد البرلمان ؟!
من الذى قال مشاركة لا مغالبة ؟!
من روج لضرورة وضع خاص للجيش فى الدستور ؟!
من قال "يامشير يامشير م النهاردة أنت الامير" ؟!
من قال " دقن و جلابية العسكر ميه ميه " ؟!
من هتف " ألف تحيه للمشير من قلب ميدان التحرير" ؟!
من اتهم ست البنات فى شرفها واتهما بأنها تعمدت التعرى حتى تحرجهم وتجرهم للصدام ؟!
من رفض المشاركة فى جمعه حرائر مصر واتهم المشاركات بأنهن ممولات ولديهن أجندات خاصة ؟!
من قدم بلاغ فى الاشتراكيين الثوريين يتهمهم بالتحريض على العنف وإسقاط مؤسسات الدولة ؟!
من قال أن الثوار "أناركية" وسيرتدون قناع "بانديتا" -على حد قولهم -وسيخربون مؤسسات الدولة ؟!
من نزل للاحتفال فى ذكرى الثورة وشغل القرآن للتشويش على الهتاف المناهض للمجلس العسكرى ؟!
من قال نرفض الدعوة لثورة ثانية والعسكرى حمى الثورة ؟!
من الذى ضرب المتظاهرين أمام البرلمان ؟!
من قال أن الشرعية للبرلمان وليست للميدان ؟!
من أقصى جميع التيارات فى لجان مجلس الشعب ؟!
من ضيق على المستقلين ومنعهم من التعبير عن آرائهم تحت القبة ؟!
من دافع عن المجلس العسكرى تحت القبة ؟!
من دافع عن وزارة الجنزورى فور توليها على عكس الثورة ؟!
من قال أن الوزير أخبره بأن " مفيش خرطوش " ؟!
من قال على الثوار بلطجية ويتعاطون ترامدول ؟!
من استحوذ على لجنة وضع الدستور الأولى والثانية ؟!
من الذى قال أنه لن يرشح أحدا للرئاسة وبعدها قام بترشيح 3 ؟!
من الذى قاطع المليونيات ونزل الميدان فقط عندما رشح عمر سليمان نفسه ؟!
من الذى هدد بحرق مصر إن لم يفز مرشحه فى جولة الإعادة ؟!
من الذى أفرج عن 14 قيادى من الجماعات الإرهابية وترك الثوار فى السجون ؟!
من الذى أعطى السولار بتاعنا لغزة فى الوقت اللى الكهرباء عندنا كانت بتقطع بالساعات يوميا ؟!
من الذى لم يحضر جنازة شهداءنا فى رفح ؟!

# اللي مضايقاه واحده فيهم ... يمسحها ويرد ع الباقي :
 ( موجه للخرفان )

الاسلام السياسى خلال عام

قررت أن أسترجع بعض (وأكرر...بعض) من مواقف تيار الإسلام السياسي وتوصلت للآتي:

الإسلاميون دعموا مبادرة حسان لجمع التبرعات للمجلس وأطلقوا اسم "جمعة الوقيعة" على التظاهرات ضد المجلس ثم يهتفون "ضد العسكر" نظراً لتهديد مصالحهم.


 أطلقوا على من تعرت أمام مجلس الوزراء "عاهرة" وتسائلوا "ايه اللي وداها هناك؟" وأطلقوا على متظاهري الداخلية بلطجية واتهموهم بتعاطي المخدرات والآن يعتصمون أمام وزارة الدفاع "آخر عمود فقري" على حد تعبيرهم.


 هاجموا الإعتصام الذي رفض الجنزوري والآن يريدون إقالته. دعوا إلى غزوة الصناديق التي قالت نعم، واتهموا من انتقد صلاحيات اللجنة العليا للإنتخابات والآن يطالبون بإلغاء المادة 28 والتي كانت في نفس ورقة الإستفتاء (لمن يقرأ منهم). ألم نكن ضد هذه اللجنة المعيبة والتي ضمت في عضويتها الصول صبحي صالح فهاجمتونا وادعيتم أنه قصر ذيل؟


 ادعوا ازدواج جنسية البرادعي لرفضه شروط الترشح والآن يبكون على شيخهم الكاذب الذي ورط التابعين المغيبين إلى مجزرتي محمد محمود والآن وزارة الدفاع.


 قبلوا "مصطفى بكري" وهللوا له، والآن نرى مشادة بينه وبين رئيس البرلمان لأنه يقوم بدوره في مسح جوخ الحكومة وتقبيل بيادة العسكري.


هاجوا وماجوا ضد زياد العليمي، ولم يطالبوا بأي فعل ضد بكري الذي اتهم الثوار وعلى رأسهم البرادعي بالخيانة والعمالة لأمريكا. ولن أتطرق إلى البلكيمي وصبحي صالح فالله غفور رحيم.


قالوا عن الديمقراطية كفر واستحوذوا على أغلبية المقاعد...بما لا يخالف شرع الله.


هذه بعض من مواقف قوى الإسلام السياسي. لهذه الأسباب لن أقبل أن أختار ما بين مطرقة العسكري أو سندان الإسلام السياسي. عفواً، كلاكما ضد الديمقراطية، كلاكما ضد المواطنة، كلاكما يشكل تهديد لمصر الديمقراطية.


عفوا، لن أنضم لهذا الإعتصام، أرفض وأستنكر العنف الذي مورس ضدكم وأنعي أهالي من سقط منكم قتيلاً وأدعو لمن أصيب منكم بالشفاء. لن أنساق وراء "مغيبون" لبوا دعوة "كاذبون".


عفواً، لن أحترم من لا يفكر سوى في اللباس الشرعي، والمواقع الإباحية ونصفه الأسفل فقط. عفواً لن أحترم برلماناً يضم في عضويته نائباً يرى أن تدريس الإنجليزية مخطط لإسقاط الدولة. ومع ذلك لن أثور ضده لأني أؤمن بالديمقراطية، ولكني سأدق الطبول وأقيم الأفراح لو تم حله بحكم محكمة لأني أؤمن بدولة القانون.


عفواً، أنتم من قمتم بهذا التصنيف "نحن....وهم". أنتم من أردتم إقصاء "الآخر"، ولعل الجمعية التأسيسية المنحلة تشهد على ذلك. لا تؤمنون بالإجماع في كتابة الدستور.


عفواً، ليس كل من هتف ضد عدوي يصبح صديقي.


عفواً يا شريكي في الوطن.....الديمقراطية خط أحمر

فيلم سكس

قبل ما أقول أي حاجه من البلاوي الزرقا اللي هتحفكوا بيها دلوقتي، تعالوا نتفق إن أنا مش شيخ، وإني مش متفقه في الدين، وإن أي حاجه بقولها هي مجرد رأي، يحتمل الخطأ، أكثر مما يحتمل الصواب، فإعتبرني ليبرالي فاسق، وإدعي لي بالهدايه، وبلاش شتيمه بالأم والاب لأنها هتبقى في ميزان حسناتي، وأنت مايرضيكش إن واحد منحل زيي ياخد حسنات على قفا حضرتك.

في بلاد بره، الناس العلمانيه الفاسده، ساعات بيعملوا حاجات غريبه جداً..يعني معظم بلاد العالم مثلاً، فيها دعاره بشكل مباح قانوناً..تروح بيت بتاع ناس طيبين، وتتكلم مع الست الكمُّل اللي بتدير المكان..اللي هي تقدر تعتبرها الأبله يعني..وتسأل عن الأسعار، والأحوال، وإحمم..الأوضاع، وهي تجاوبك بلطف شديد يليق بأمينة مكتبه تابعه لوزارة الثقافه الفرنسيه، وبعدين يطلعولك البضاعه، عشان ماتخدش حاجه مش عاجباك، أو لا سمح الله، معيوبه..وتخش تتنيل، وتخرج..ولو ماتمش تنفيذ اللي إتفقتوا عليه، أو إتضحك عليك، تطلب لها البوليس، وييجي عمو الضابط يرجعلك حقك من ولاد الحرام اللي نصبوا عليك دول.

والسبب الرئيسي في إن بلاد بره بتسمح بالموضوع ده (طبعاً غير إنهم كفره وعلمانيين) مش إنهم مبسوطين كده، أو لأن الاسره الاوروبيه العاديه شايفه إن الدعاره من أسباب الرقي والتقدم..ولكن السبب هو الآتي؛

الدعاره كده ولا كده، هتبقى موجوده، لن تختفي - ولا مؤاخذه في الكلمه – العاهرات، لمجرد إن الموضوع غير مصرح به قانونياً..دي حتى المهنه دي بيطلق عليها أقدم مهنه في التاريخ، فهم عارفين إن مهما حاولوا يمنعوها، كان غيرهم أشطر، والدليل، إن عندنا إحنا في مصر، وفي الدول العربيه التي لا تسمح بالدعاره – لأن هناك دول عربيه تسمح بها بالمناسبه – لم تختفي الدعاره، بل موجوده، وشغاله ميت فل وعشره.

فالجماعه الخواجات دول، فكروا بشكل براجماتي عفن، وقالوا خلاص، يعملوها تحت عينينا، أحسن ما يعملوها من ورانا، وعلى الأقل ساعتها، نقدر نتحكم في الموضوع، فالعاهرات يجرين كشف دورى للتأكد من سلامتهن، حتى لا تتفشى الامراض التي تنتقل عن طريق ممارسة الجنس، وهي كثيره وقاتله، وفي نفس الوقت، يقل معدل الجريمه، لأن الموضوع يدار على المكشوف، فمافيش واحد عدم المؤاخذه قواد، هيضرب واحده أستغفر الله العظيم عاهره عشان ما أعطتوش "السمسره" بتاعته، أو يضرب زبون عشان مادفعش أو عشان يسرقه.

يعني الدعاره هناك، بتدار بالأخلاق الحميده، وبالحسنى، وأحسن من وزارة التعليم عندنا..وكمان البلد بتاخد عليها ضرايب، تصرف بيها على مشاريع قوميه، يستفيد بها المواطنين، ممارسي الدعاره واللي مش بيمارسوها على حد سواء..يعني ممكن لما حضرتك تسافر بلد من دول، تكون مشيت في شارع تم رصفه بأموال مصدرها عرق البغايا، أو تكون ركبت مترو، تكلفته تم توفيرها من جيوب الناس الهيجانه.

يعنى العلمانيين الكفره، عملوا بمبدأ إن، دفع الضرر، أبدى من جلب المنفعه..لأنهم إعتبروا إن الضرر هو إنتشار الأمراض، وإرتفاع معدل الجريمه، والمنفعه هي، إنتشار الفضيله والسلوك الحسن.

وبنفس المنطق، هناك بعض الدول التي تسمح ببعض أنواع المخدرات، الأقل ضرراً على الصحه، حتى لا يتسبب الكبت أو الغش التجاري في تعاطى الناس لمواد خطره قد تقضي على حياتهم وتقتلهم، وفي نفس الوقت، أهه أريح من المطاردات، والحملات على الباطنيه وطريق بلبيس، وتبادل إطلاق النار مع مهربي المخدرات وشغل أفلام ستيفن سيجال ده.

بس زي ما قولنا، دول العلمانيين المنحلين الفسده، اللي ربنا هيخسف بهم الأرض يوماً ما، من جراء أفعالهم المشينه.

إحنا دول عندها دين، وأخلاق وقيم..ووجود الدعاره بها بشكل غير مجرم قانونياً، هو أمر مرفوض جملة وتفصيلاً..وأظن كلنا متفقين على كده.

يبقى مافيش دعاره.

ولأن البنى آدم مننا له متطلبات وقدره على التحمل..مش هينفع يقضيها صيام وتعفف طول عمره، يبقى المفروض الشاب مننا وهو حلو عنده 19،20 سنه كده، يكون متجوز، ويمكن معاه عيال كمان..لكن الظروف الإقتصاديه التي ليست على ما يرام، والتعقيدات والعوائق التي تبدأ بالدبله وطقم الصيني، ولا تنتهي بـ "عليّ الطلاق ماهجوّزك بنتي غير لو جيبتلها حماده هلال يغني في الفرح" تعطل الزواج، وترفع معدل السن الذي يحدث فيه.

يعني مافيش دعاره، ومافيش جواز.

طاب إيه؟..ده على رأي اللمبي، يا توفروا لهم الهوا النقي، يا توفروا لهم الكله.

لم يعد أمام الشباب الذي لم يعد قادراً على التعفف سوى حلين..إما التحرش، أو والعياذ بالله، أستغفر الله، ولا حول ولا قوة إلا بالله، الأفلام الجنسيه.

بس دي حرام!!

يعني الكبت ده هو اللي حلال؟

في أمريكا عملوا فيلمين، واحد إسمه (أربعون يوماً وليله 40

days and 40 nights)

وآخر إسمه (الأعذر ذو الأربعين عاماً

The 40 year old virgin)

وأعذروني إني مالاقيتش مذكر لكلمة عذراء، وغالباً الأصح لغوياً هي كلمة بتول..بس ما علينا..الفيلم الأول يتحدث عن فتى قرر أن يمتنع عن الجنس لمدة أربعون ليله، والثاني كما هو واضح من أسمه، يتحدث عن رجل يبلغ أربعين عاماً، ولم يمارس الجنس في حياته من قبل، والفيلمين يتعاملا مع الشخصيتين على إنهما شئ مذهل، وعجيب، أن يكون هناك إنسان حاله حال بطل الفيلم، وكأن الموضوع لا يتصوره عقل..طبعاً لأنهم ما يعرفوش إن هنا في مصر، دي شخصيات عاديه وطبيعيه جداً.

ده العادي عندنا.

يعني ممكن الناس دي تيجي تعمل عننا إحنا أفلام، عن مدى الكبت اللي بنعاني منه، وهتجيب إرادات أعلى من الفلمين دول، وغالباً أعلى من "أفاتار" شخصياً.

اللطيف بقى، إن دلوقتي مجلس الشعب "الموقر"، تقدم أحد أعضاؤه "الموقرين" بطلب إحاطه لمناقشة فكرة حجب المواقع الإباحيه عن مصر.

الموضوع من على الوش كده، شكله زي الفل..أفلام قبيحه، مخالفه لديننا وعاداتنا وتقاليدنا، والراجل مش عايز شبابنا يتعرض لها أو يتفرج عليها.

بس تعالوا نفكر فيها كده بالمنطق البراجماتي المتعفن، أو بمعنى آخر تعالوا نفكر فيها بشكل واقعي.

الشباب اللي مش عارف يتجوز قدامه حل من ثلاثه، دعاره، أو تحرش أو فيلم جنسي..يا ترى من أخفهم ضرراً؟..يا ترى لو منعنا الأفلام دي، هل الشباب هيعود إلى الطريق المستقيم، ولا هيتجه لتفريغ كبته في الدعاره والتحرش؟

طاب بلاش المنطق ده..تعالوا نفكر فيها بمنطق تاني

مره تانيه بفكركوا إن انا مش واحد تاخد منه فتوى دينيه، بس على حد علمي القليل، إن سيدنا عمر إبن الخطاب في عام المجاعه، لم يكن يطبق حد السرقه، لأن شروط تطبيقه إنتفت، لعدم توفر الطعام والحياه الكريمه التي تغنى المسلم عن السرقه.

يبقى مجلس الشعب الموقر، اللي فيه ناس بتتحدث بإسم الدين، المفروض يمنع الأفلام الإباحيه، ولا المفروض يحاول يوفر حياه كريمه وفرص عمل، وظروف مواتيه للشباب إنه يتزوج، بعدين يبقى يشوف موضوع الأفلام والحاجات دي بعدين؟

ولو فتحنا هذا الباب..اللي هو منع الأشياء بحجة إنها حرام..هل سيقتصر الامر على شوية مواقع بورنو؟

ولا بعد شويه هنقول إن الكتب الفلانيه فيها مقاطع تتحدث عن الجنس، أو فيها تلميحات على الدين، وهذا كلام لا يصح، يبقى نمنع الكتب دي؟

والفيس بوك، اللي الناس بتحط عليه صور ماجنه فيها فجور وإختلاط، وأشياء لا تصح – وبالمره بيقوّموا من عليه ثورات – ينفع نسيبه كده لغاية ما ندمر شبابنا؟..ولا نقفله؟

طاب والبلوتوث، والرسائل المصوره، اللي الشباب بيتبادلوا عليها مقاطع ساخنه، وصور عاريه، نسيبها لهم؟

وتبادل الرسائل ووالعياذ بالله الشاتينج، اللي بقى كله شقط وقلة أدب ومسخره، ألا يغضب كل ذلك الله؟

صدقوني مش هنخلص.

وسيبك بقى من كل الكلام اللي فات ده..

بقى مجلس شعب الثوره، اللي جاي ينتشل مصر في فتره من أصعب فترات تاريخها الحديث، والبلد فيها إنفلات أمني، وإنهيار إقتصادي، وماشيه بإعلان دستوري مؤقت، ومافيهاش رئيس جمهوريه، ومرشحي الرئاسة فيها بيتثبتوا ع الدائري..جاي عشان يناقش فيلم سكس؟

ياخي ....ولا بلاش

بس زي ما أنا قولت، أنا ليبرالي منحل، وزنديق قديم في الزندقه، فماتاخدوش على كلامي..

خدوا كلام الإمام إبن تيميه..اللي قال:

إن الله يقيم الدولة العادلة وإن كانت كافرة ولا يقيم الدولة الظالمة وإن كانت مسلمة..

فيا أعضاء البرلمان "الموقر" ، لو عايزين دوله محترمه بجد، أقيموا العدل، وإدفعوا الظلم، قبل ما يطلع واحد فيكم يتكلم على فيلم سكس.

المستقبل سيكون أفضل
كيف ستذهب إلى عملك اليوم و أنت تعلم أنه في الغد الباكر سيكون محرما تماما لإن السلفيين في طريقهم لحكم البلاد و أول قراراتهم سيكون تحريم عملك مهما كان نوعه، حتى لو كنت رجل مطافيء، بحجة أن الحرائق قضاء الله و قدره و لا يجب أن نوقفها؟ (ملحوظة سريعة: طبعا بهرج و ببالغ لإن التعليقات كلها سابت الموضوع و مسكت في ديه، أنا بتريق على خوف الناس المبالغ فيه من السلفيين مع العلم أن بعض هذا الخوف مبرر)٠

كيف ستقابل زوجتك أو أولادك و أنت تعلم أننا في طريقنا لحرب أهلية ستقتل نصف سكان هذه البلد و سيكون ربعها مفقودا و الباقي على الحدود يحاولون الفرار؟

كيف يهنأ لك نومك و نحن على شفى حرب عالمية سببها زحف شبابنا لإسرائيل ليتبعها ضربهم للسد العالي و ستتوالى الأحداث إلى أن يضربوا بسلاحهم النووي فتقوم الحرب العالمية الثالثة و يباد نصف سكان الكوكب؟

كيف مازلت تتنفس و فلول الحزب الوطني يخربون الثورة من الظلام، مع تواطؤ كل من رجال الشيطان و الجيش و الإخوان و أقباط المهجر و ألتراس الأهلي و السي أي إيه و المكتب الخامس اللي في الدور السادس؟

هل تراودك هذه الأفكار؟ هل بدأت أن تشعر بالخوف من المستقبل و الإكتئاب الحاد و راودتك أفكار الهجرة أو الإنتحار بالقفز من فوق برج القاهرة أو بالجلوس عليه و لا تستطيع أن تصدق أي خبر أو وعد أو حلم بمستقبل أفضل؟ هل بدأت أن تتشكك في جدوى الثورة نفسها، أو بدأ إبليس الشيطان الرجيم بالوسوسة لك إن مبارك ماكنش وحش قوي و لا عاذوا بالله؟

الخبر الجيد أن هناك ثلاث حلول لمشكلتك، أولهم أن تبدأ حالا في إجرائات الهجرة، ثانيهم الذهاب لدكتور نفسي محترم، و الثالث هو التفاؤل الإجباري المبني على أدلة و براهين أن المستقبل أفضل، مع العلم أن الضامن هو الله و لا أحد يعلم ماذا سيحدث الغد، و كل الإختيارات متاحة فعليا، و لكن إختيار التفاؤل بعد معرفة أسبابه قد يساعدك على حل حالة الهلع التي أصابتنا جميعا.

أنا شخصيا أحاول جاهدا أن أختار الحل الثالث، ليس فقط لإني شخص أحاول أن أتطبع بطبع التفاؤل، و لكن لإنني وجدت ما يعضض موقف التفاؤل داخلي من أسباب تاريخية و حالية تثبت أن المستقبل سيكون أفضل.

المستقبل سيكون أفضل سياسيا حتى لو أخذت الدولة إتجاه لا يتوافق مع معتقداتك و إتجاهاتك السياسية و الفكرية.

لماذا؟ لأن التنافس سيكون موجودا، لإن عصر الإحتكار السياسي إنتهى، و سيحاول دائما و أبدا كل من يمسك بزمام الحكم أن يثبت أنه الأفضل، لإنه سيهتم بعدم إستفزاز معارضيه، و إرضاء الجماهير بكل الأشكال، و مهما حاول مجددا أن يقمع معارضيه، سيكون هناك إنترنت لن يستطيع قطعه بعد ما حدث، لن يستطيع أن يكبت الحقيقة و النقد، لدرجة إنه سيكون خائف من الرأي العام و الجماهير بشكل قد يتسبب في المدى القصير في بطء القرارات و لكن في المدى الطويل سيعلم الحكام أن السلطة للشعب و يجب أن يدرك المشاكل الحقيقية له و طريقة حلها.

لن يستطيع الحاكم أن يتحول لديكتاتور مرة أخرى، لإن من السهل أن يتجمع مليون شخص بعد صلاة الجمعة ليهتفون بسقوطه فيفقد شرعيته، سيحاول أن يتطبع بأخلاق الأنبياء و الملائكة، و سيخاف كل المنافقين من نفاقه، لإنه بعد سقوطه سيوثق كل هذا ضدهم، فسيحاولون كلهم أن لا ينافقوه و لا يضعون صورته في مكاتبهم و في الشوارع و أن يسمون المدارس و المستشفيات بإسمه و إسم زوجته.

أي إتجاه مهما كان لو مسك زمة الحكم عنده حلان، أولهم أن يستجيب لمطالب الشعب و يرضي الأقليات أو المغادرة بسبب فشله و عدم تلبيته لحاجات المجتمع.

المستقبل سيكون أفضل إقتصاديا أيضا، مهما طالنا من خسائر، لإن نصف الأموال كانت تسرق، لإن نصف المعاملات المالية من رشاوي و إكراميات و بسبب الإهمال كانت لا تمر على الضرائب، كانت لا تؤيد، الفساد و الإهمال كان يهدر فعليا نصف المال و المعاملات.

الفساد كان يخيف الإستثمارات الأجنبية، كان المستثمر الأجنبي غير قادر لحساب تكاليفه و لا مصروفاته و لا إيراداته بسبب كل هذه المشاكل.

المستقبل سيكون أفضل لإن العالم كله يريد أن يساعدنا الآن، لإستباق كسب الصداقة مع الشعب و الحكومة الجديدة، و لخوفه من تفاقم الأمور عندنا مما قد يتسبب في تصدير ٨٥ مليون إرهابي أو مهاجر غير شرعي قادرين على تدمير العالم أو الإجهاز على أوروبا و أكل شعوبها أحياء و تعريبها و أسلمتها و هو فيلم الرعب الأسوأ لأوروبا و لهذا ستتسابق بكل قوتها لمساعدتنا، مش عشان سواد عيوننا بس لخوفها من تفاقم الوضع مما سيعود عليها مستقبلا بالسلب.

سنعمل أكثر كلما شعرنا بالعائد و الأزدهار اليومي العائد علينا في الخدمات اليومية و تسهيل حياتنا.

لن تهمش الكفائات، سيبحث الحاكم و الوزير و المدير عن الكفائات ليساعدوه لإن هذا سيكون السبب الجوهري لإستمراره، ليس لإنه جوز أخت المدام أو من رجال الحزب الموثوق فيهم.

و التاريخ أكبر شاهد على إزدهار الدول بعد أزماتها و كوارثها و حتى مذابحها، و الفترة اللي فاتت علشان أعالج نفسي من تخيل الأسوأ، بصيت في التاريخ، و شفت الدول اللي زينا عملت إيه؟ إزاي الهند اللي قتلوا بعض علشان إختلاف أديان دلوقتي رئيسهم من أقلية إثنين في المية، يعني كإننا إخترنا واحد بهائي مثلا، إزاي ماليزيا و تركيا نهضوا؟ إزاي اليابان و ألمانيا من الحضيض لقوى عظمى بعد بضع السنين، قصص ثانية لدول كثير، تديك الأمل إن أول ما السلطة تروح للشعب فعلا، هنطلع لفوق، مهما كان في مطبات لإننا لسة بنتعلم نسوق نفسنا بعد ما كنا متساقين و إحنا مغميين. أو ما عنينا تتعود على النور، هنشوف هدفنا و نروحله.

رواندا بالذات من البلدان التي إعطتني أمل كبير في بلدنا و شعبنا، رواندا من خمستاشر سنة فقط، ذبح فيها مليون مواطن من أصل عشرة مليون مواطن، أي عشر الدولة قتل و ذبح في واحدة من أبشع مجازر التاريخ، بين عرقين الإختلاف بينهم يكاد ينحصر لحجم الأنف، التوتسي و الهوتو.

لا تقولي بقى مسلمين و مسيحيين و فتنة و ضغائن، لأ، دول دين واحد، طلعوا على بعض كده السلام عليكم بالرشاشات مليون واحد إترمى في النيل، و الباقي روحوا ناموا.

و العرق ده أغلبية كاسحة و الثاني أقلية، إيه اللي حصل بعدها؟ هل البلد إتطورت و لا رجعت لورا؟

بعد خمستاشر سنة فقط، أعرفكم.. رواندا، بلد لها قصة نجاح مبهرة للعالم إلى أن أسماها "سويسرا الأفريقية" و رئيسها الذي كان السبب في نهضتها بعد إختيار الشعب له و هو لم يتم الأربعون عاما لقب أكثر رئيس منتخب بشكل ديموقراطي في أفريقيا، و أصبحت من أكثر الدول جذبا للإستثمارات الخارجية و السياحة في أفريقيا، و صنع عنهم عشرات الأفلام و تدرس قصة نجاحها في الجامعات العالمية، و هناك بحث شهير عنها إسمه "لماذا يحب رؤساء الشركات الكبيرة رواندا؟" الي بيحكي عن شعب عمل المستحيل، و رئيس دولة كان بيروح يقابل مدراء الشركات العالمية كلهم واحد واحد.

هل تعلمون لماذا؟ لإن الأزمة و الخسائر و المشاكل علمتهم النظر للأمام و التركيز على البناء، إلى أن بنوا دولتهم، و إستغلوا كل مليم أحمر معونة و إحترموا كل مستثمر أجنبي و بجلوا كل سائح و أحبوا بلدهم بجد.

و غير رواندا، في بلدان كثير عملت نهضة و من تحت الصفر بقت دول مهمة ليها كلمة في بضع سنوات، بالعمل و بالقيادة النزيهة الخائفة من شعبها.

و إحنا كشعب بقينا فيلم رعب و كابوس لأي حاكم قادم، التحريروفوبيا لن تجعل حكامنا ينامون الليل.

المهم ماتعملناش إحنا رعب من أي أثار جانبية جت بعدها، أكيد بعد إسقاط نظام و إختفاء الأمن و كل ما هو مسبب للنظام هنشوف مشاكل، هندفع ثمن الحرية و البناء من الصفر على مية بيضة، و ماتخليش وجودك في نص الموقف و التهويل يرعبك، إحنا في مكان أحسن من اللي أصلا إحنا كنا متخيلينه.

بعد الإحصائيات، إكتشفوا إن بعد إختفاء الأمن إزداد معدل الجريمة متين في المية، شايفه كثير؟ بعد إختفاء كل العساكر و الظباط و أجهزة كاملة؟ هل تعلم إن في أمريكا لما النور قطع كام يوم المعدل زاد ألف في المية؟ و ده في وجود الشرطة كمان؟

بعد إختفاء أمن الدولة و الشرطة و النظام، لمدة أشهر لم تمس كنيسة من بلد المفروض إنها بتغلي من الفتنة الطائفية؟ و بعدها كنيستين فقط لأسباب أظن إن في وراها قصص لسة ماعرفنهاش و حتى لو مافيش قصص، كنيستين بسبب حادثتين عارضتين مازالوا تحت نطاق الإستثناء، ماشفناش كل مسلم ماسكله سيف و فاس بيقتل المسيحي أو بيهد كنيسته، و في قصص بطولية لمسلمين دافعوا عن مسيحيين و العكس في الأحداث ديه.

أزمة إقتصادية و هبوط حاد متوقع طبعا بسبب غياب النظام و إن مستقبل الحكم و شكل الدولة غامض، هنجوع؟ هنجوع سنة أو سنتين؟ أنا و إنت هنستحمل و في ناس مش هتستحمل و تموت من الجوع و تتمرد؟ فنعرف إن كان في توزيع ظالم للدخل في البلد ديه؟ و هنعرف قد إيه كنا متجاهلين طبقة نزلت تحت مستوى البني آدمين فنبدأ نتضامن معاهم غصب عننا و نمد إيدينا لبعض؟

الثورة النهاردة بتعملنا خدمة جليلة إحنا مش مقدرنها، الثورة بتعرفنا مشاكلنا الحقيقية و حجمها، و أول خطوة للحل هي معرفة حجم المشكلة لوصف العلاج السليم، إحنا كنا عايشين مع حكم و نظام قاعدين يدولنا مسكنات، تخلينا مش حاسين بالمشكلة الحقيقية و هي قاعدة تكبر لمدة ثلاثين سنة لحد ما كانت هتموتنا و تدمرنا.

لو الثورة ماكنتش قامت، كنا هنبقى فاكرين كله تمام، و المشاكل صغيرة، و كانت مسيرها هتضرب هتضرب، و أنا شايف إن الثورة لحقت ضربة أكيد كانت هتكون أسوأ بكثير كانت مسيرها تحصل بالقيادات القذرة اللي كانت بتحكمنا ديه و موديانا كل يوم للأسوأ.

كان زمان هذا الشعب الذي يلقبه البعض بغير مستعد للديموقراطية بيروح للأسوأ، و إستعداده للديموقراطية بيقل يوم عن يوم، فلما تيجي قشة تقسم ظهر البعير يكون الموضوع أسوأ فأسوأ، بقالك ثلاثين سنة مش عارف تعده؟ مش عارف تعرفه يعني إيه ديموقراطية، بتزود الدستور كل يوم مواد في لحظة كده تقلل من مساحات الديموقراطية و ترجع تكذب عيني عينك و تقول بديها كمان حرية؟

أ ب حل لأي مشكلة حل التعليم و بناء الشخصية و الهوية، و دول بسم الله ما شاء الله أكثر حاجات كانت مهملة، و مش بس فضلت على حالها، لأ كانت بتدهور و في النازل كل يوم، من خريج جامعي فكره و علامه يماثل فكر خريج الحضانة في دول متقدمة، و بيشتغل في مكان غير مكانه لدخوله كلية مالهاش دعوة بإمكانياته.

آخر الدراسات العلمية إكتشفت إن أهم قاعدة بتفرق في إنتاجية الشخص و صفاته، هي نظرته للوقت، و قسموا الناس لست أنواع، نوعين بيركزوا على الماضي، و نوعين بيبصوا أكثر للحاضر، و نوعين مركزين أكثر على المستقبل، و إكتشفوا إن الشعوب الأكثر إنتاجية هي الشعوب المتربية أو اللي قررت تركز أكثر على المستقبل.

و الدراسة العالمية ديه أعتقد إنها لخصتلنا مشكلتنا، محتاجين إزدهار، ياللا نذكر إنجازات الفراعنة، محتاجين نتباهى بديننا، ياللا نقعد نحكي حكاوي السلف الصالح و زمان الناس قد إيه كانت متدينة صح مش زينا ماشيين على حل شعرنا.

الخطاب اللي بيركز على الماضي ده، كان بيجنبنا إحراجنا من ضئالتنا في الحاضر، و في نفس الوقت يحبطنا جميعا إننا عمرنا ما هنكون زيهم.

الحل إننا نكون من النوع السادس، اللي بيرسم مستقبل أفضل في خياله أولا، ثم يسعى لتحقيقه، نعلمه لأولدنا بس قبلها نحاول نتبناه و نعلمه لنفسنا، ممكن نقعد نتخيل الأسوأ فنحبط و نعيط و نلطم و نهاجر، أو ممكن نحسبله بس نتخيل الهدف الي عايزين نوصله و نحاربله.

الرسول صلى الله عليه و سلم لما فتح مكة قال إن ده كان الجهاد الأصغر، و الجهاد الأعظم هو جهاد النفس، التحرير فعلا كان الجهاد الأصغر، بناء مصر و الإسترجال و إننا مانعملش على نفسنا كل ما متطرف أو متحجر فكر أو منتفع يقولنا بخ هو الجهاد الأكبر، إننا نقف على رجلينا و نبني و ننكر الذات حبتين هيعود علينا كلنا بالخير قدام.

لو كنت مستعد تقف في التحرير و تحارب القنابل المسيلة للدموع و رصاص القناصة بس مش قادر تبني و تحارب يوم بيوم علشان البلد ديه تقوم تبقى لا شجاع و لا وطني، تبقى مجرد واحد جاله "أرينالين رش" أو تدافع أدريناليني يخليك راجل في الموقف نفسه بس في الحقيقة إنت كسول و جبان.

غمض عينك، شوف مصر هتكون عاملة إزاي في المستقبل القريب، إتخيل من غير ما تحاول تكون واقعي أو منطقي، إحلم، إحلم بمصر نفسك تعيش فيها و ماتسيبهاش، إحلم بمصر متقدمة، مصر محترمة، شعب محترم، دولة محترمة عالميا، قصة نهضة نتباهى بيها، إحلم إننا بنحل مشاكلنا، اللي عملوا كده قبلنا مش أحسن مننا و فيهم اللي كان أوحش مننا و بكثير، إحلم إن بلدنا هتكون حتى جنة الله على الأرض.

بعد ما تحلم فتح عينك، روح شغلك، و كون إنت الحلم، قطعة دومينوا هتزق اللي قدمها، ترس في ماكنة مش هيعطلها و هيزق صح عشان يشغلها، لو عملت كده بس، تبقى البطل، اللي مصر محتاجاه


وأخيراً

ذكرت مصر فى القرآن الكريم خمس مرات

{اهبطوا مصراً فإنَّ لكم مَّا سألتم} (البقرة :61)

{وأوحينا إلى موسى وأخيه أن تبوَّءا لقومكما بمصر بيوتاً} (يونس:87)

{وقال الذي اشتراهُ من مصر} (يوسف:21)

{ادخلوا مصر إن شاء الله آمنين} (يوسف :99)

{قَالَ يَا قَوْمِ أَلَيْسَ لِي مُلْكُ مِصْرَ} (الزخرف:51)

فالله خير حافظً هو ارحم الراحمين

المسيحي المستفز الي قالي ...قولي احنا مطضهدينكم في اية يا مسلمين !

احد المسيحين المستفزين عندما دار النقاش بيني  وبينة عن المشكلة الطائفية وقالي بالفم المليان ..انتوا ياعم كل شوية تقولي المسلمين مضطهدين المسلمين مضطهدين ..فين الاضطهاد دة قولي صور من صور الاضطهاد ..احمدوا ربنا اننا سبناكم تعيشوا بننا ... المسيحية والمسيحيين هم الي حميينكم .... المسلمين  في  مصر مش مضطهدين 

روحت راصصلة كل الي بنعاني منه طوال 30 سنة  .. كل يوم حد يا اخي بسمع القداس في الكنيسة الي ورانا وميكرفون الكنيسة جوة البلكونة ... والقسيس عمال يدعي  ويقول اللهم عليك بالمسلمين ومن والهم الهم شتت شملهم ويتم اطفالهم ورمل نسائهم

المسلمين مضطهدين في  مصر لما عينوا محافظ مسلم ... والاصوليين المسييحن عملوا مظاهرات ورفعوا علم امريكا وقالوا  مينفعش  يحكمنا محافظ مسلم 

هو من قلة المسيحيين 

الملسمين اضطهدوا لما الجماعة السلفية المسيحية ... فجرت مسجد في اسكندرية وهدمت مسجد في اطفيح وحرقت مسجد في امبابة ..ومنعت فتح مسجد بقرار محكمة في عين شمس 

المسيحيين ولاد اللذين المفتريين ..لو عاوزين يبنوا كنيسة اي حتة ارض فاضية يطلع عليها كنيسة ودكر بس يبقى يقول فين التراخيص ولا التصاريح 

لكن احنا بيطلع عيننا لما نيجي نطلع مسجد ولازم موافقة الامن العام وامن الدولة ووزارة الاسكان ومجلس الوزراء ورئاسة الجمهورية  

المسيحيين الوحشيين لما طلع القمس بولس المتعصب وقال 

الصناديق قالت مسيحية .. والمسلم اللى  مش عاجبة ياخد نفسة ويروح على السعودية

المسيحين الغلسين ..اللي لما صفوت حجازي حط صورة للكابتن ماجد  وهو لابس زي القسيس ومعلق صليب  ... اعتذر مليون مرة وبردو مش عاوزين يسامحوه ... وطلعوا فتاوي بقتلة 

المرشد العام بتاع الاخوان المسيحيين لما قال المسيحي السويدي اهم عندي من المصري المسلم ... محدش جه جمبة ولا اتهموه بالخيانة ولا انة ملوش  انتماء للارض اللى عملت منة بني  ادم 

تلاقي يا جدع المسيحي من دول طالع الاتوبيس ولا قاعد في الشغل مطلع الانجيل وعمال يقرا بصوت عالي  وكانة عاوز يقول للمسلمين اسمعوا يا كفرة يا ولاد الكلب ولو واحد مننا بس فكر يطلع مصحف ويقرا ولو بصوت خافت تلاقي الناس  ابتدت اللى  يغمز لصاحبة واللى يعلق بصوت حنجوري مهيب يقول ان الدين عند الله المسيحية 

واللى  يبصلنا  بنظرة مقيتة وكاننا ماسكين كتاب جنسي مش كتاب ربنا 

لا بقى واللى ينرفزني اكتر 

 القسيس فكري ويليام الهربان من مصر بسبب حكم عسكري ومتلقح في الدانمارك لما طلع يحرض الناس على المسلمين ويقولهم مساجدكم فيها اسلحة  وكل شوية تقولوا لنا الحماية الدولية الاسلامية الحماية الدولية الاسلامية 

ابقى خلي السعودية تنفعكوا .... والله ..شوفوا والله ...قبل ما اي عسكري

سعودي يخش مصر لنكون مخلصين عليكم كلكم ... ومع كدة تلاقي المسيحين بيجمعوا توقيعات عشان القسيس فكري ويليام  عشان الحكم العسكري يتلغي والقسيس ينور مصر تاني  ويتحفنا بفتاوية المكفرة للمسلمين والمحرضة ضدهم 

وكلة كوم والقمص ابو انييس اللى  طلع واعلنها صراحة ... منبقاش رجالة لو  مولعناش في مساجد  حدائق القبة كلها ....والشعراوي  اللى  مخبي المسيحيات في المساجد  ...ومع ذلك تلاقية ولا حد جة جمبة 

ومش بعيد تلاقي الحكومة مطلعاه في قرعة القدس السنة دي احتفالا بما قالة 

ولا الشريعة المسيحية الي  عاوزين يطبقوها دي ياعم 

طب انا مسلم ومش عاوز شريعتك ياعم خليها لنفسك ...لا ازاي ان الدين عند الله المسيحية ولازم تطبق الشريعة عليك 

وبعدين انت محمي بينا ...احنا نقدر نحميك ...ياعم هو انا ناقص دراع 

ما انا احمي  نفسي .... وبعدين تحموني  من مين 

هو انا عملت حاجة  لحد 

لا هو كدة ..... ومش عاجبك روح السعودية 

طب انا نفسي في لحمة بتلو في عيد الاضحى 

لا هو مفيش غير الخنزير  اذا كان عاجبك ولحوم المواشي الاخرى للتصدير 

طب انا مباكلش الخنزير .... الخنزير حرام 

حرام مين ياعم ..... هو دينكم دة دين اصلا !

ولا كلة كوم واختى اللي كل يوم تبقى قاعدة في امان الله 

في اتوبيس ولا في جامعة ولا في كافية .... وتلاقي واحدة من المسيحيات تقولها حجاب اية يابنتي الي  انتي لابساه .... خدي كتاب عن فوائد التبرج ..وكشف الشعر 

وهي تقولها لا انا مسلمة وعاوزة افضل محجبة ..... وهي  بردو الي  في  دماغها في  دماغها 

طب دة كشف الشعر دة حلو وجميل وصدقيني انا عاوزة مصلحتك 

ياماما ...انا مسلمة انتي اية مبتفهميش 

طب بصي انتي  لية متخشيش في  المسيحية ...انا  خايفة عليكي  والله 

وانتوا قرائنكم محرف وغلط في غلط 

يابنت الناس  لا انا مسلمة سبيني  بقى في حالي 

البت بقى مبتسبش اختى  في  حالها وتقوم وتقولها ان الدين عند الله المسيحية ... ومش بعيد تشاور على دقنها ..وربنا لا اوريكوا 

واكتر حاجة بقى بتعصبني  وتجنني  موضوع العلم الي  بيشيلوه من النسر ..ويحطوا مكانة الصليب 

صليب اية دة ياعم .. طب انا مصري والله وبحب البلد دي بجد وهموت ليها وعشانها ...بس انا مش مسيحي انا مسلم ومش مؤمن اصلا ان سيدنا عيسى اتصلب 

مينفعش  تحطلي رمز دينك على علم بلدي ..لأاني عمرة ماهشيلة ...عمري ما هخاف على حاجة انا مش مؤمن بيها ...استحالة احافظ على علم علية رمز لا يعنيني في شيء 

ومع كدة ...الاقي واحد من اخوانا البعدا ..يكشرلي ويقولي مسيحية مسيحية ... شاء من شاء وابى من ابى 

عامة في نهاية الموضوع دة انا بوجة رسالة لمسيحي مصر .... 

مسلمين مصر لن يصمتوا على الاضهاد طويلا .... والقشة قد تقسم ظهر البعير ... فما بالكم اذا كانت المساجد تهدم والتهديدات بالطرد من البلد والابادة متوالية بصورة يومية  لمجرد ان بعض المتطرفين المسلمين من مسلمي المهجر يطالبون بحماية  دولية ..مع اننا طول الوقت بنتبراء منهم 

وبنرفضهم

هذه القشة

قد تجعل البعير يتحول الى وحش كاسر ... هادما المعبد على الجميع 

انقذوا بلدكم من التفرق ومن الانقسام .... لابد ان تعود مصر كما كانت بلا تمييز ولا تطرف ديني  وبلا جهل واحتقان ...

وقبل ذلك انقذوا شريعتكم المسيحية التي ظلت 2000 عام مثالا على الرحمة والمودة والسلام والحب والتاخي والمساواه 

والان يتم تشويهها على ايادي المتطرفين والاصوليين 

وما يتم تشوهيهة في ساعة لا يمكن اصلاحة الا في قرون 

البناء اصعب من الهدم 

اللهم بلغت ... اللهم فاشهد 

امضاء .... شاب مصري عانى 23 عاما من عمرة ...من  الاضطهاد المسيحي

الاهم تنزلوا الاستفتاء على كل حال

السلام عليكم ورحمة الله وبركاته 

فاقع مرارتى هذه الأيام كل ما أفتح الفيس بوك واليوتيوب والمدونات ألاقى واحد عامل صورة البروفايل نعم ولاء وألاقى واحد متصور وعامل فيديو تحفة عن إن التعديلات هتودينا ورا الشمس وإن دى مش مطالب الثورة وإن الثورة طالبت بدستور جديد ولا لتعديل الدستور وواحد تانى بيقول إزاى بس إحنا لازم نقول نعم وبالفم المليان لان التعديلات هتنقلنا خطوة لقدام وعجلة الحياة هتمشى وهتلعب معانا ويبقى عندنا مجلس شعب ورئيس منتخب وإييييييييييه

وشوية ألاقى واحد تالت بقى بيقول : فينك يابابا مبارك ... كنت بتحبنا ومكنتش بتغلبنا ... كنت بتكتب لنا استمارات الإستفتاء بنفسك ... ويعيط شوية ويضحك صحابه عليه

وألاقى تسعة مقدمين بلاغات للمحكمة الإدارية بيطالبوا بإلغاء الإستفتاء والمحكمة تقول الإستفتاء من حق الجيش يعمله ودا قرار سيادى وملناش فيه...

وشوية ألاقى حملة لعمل مظاهرة مليونية عشان نلغى الإستفتاء من الأساس ونعمل دستور جديد

وشوية تانيين بلاقى واحد عمال يناقش ثغرات كتيررررررررر فى الدستور ويقول المفروض نحرق الدستور فى ميدان عام مع صورة مبارك أو مبارك نفسه إذا إستطعنا

وناقص ألاقى واحد داخل كاتب للبت بتاعته عالوول : بصى يا بيبى إنزلى يوم الإستفتاء وقولى لاء عشان خاطر حبيبك لو بتثقى فيا

تصدقوا فعلا ممكن :D

دا طبعا غير الإعلان الدستورى الإنتقالى للمستشار البسطويسى وقراره بترشيح نفسه لرئاسة الجمهورية (( عن نفسى بفكر فى دعمه ومتقوليش ليه عشان هقولك وإنته مالك

وغير ناس كتير أوى بتتكلم عن تعذيب الجيش للمدنيين والمحاكم العسكرية وسؤها

....

دلوقتى بقى أنا فين من كل دا كمواطن مصرى طالع تلاتة تيت مامته بين كل دول ؟؟؟

أنا من وجهة نظرى الشخصية إن الناس لم تدرك معنى الحرية بعد بشكل كامل .... إنته تقدر تتكلم وتقول فى حالة النعم او لاء اللى هتكتبها فى الإستمارة اللى إنته عايزة ... بمعنى لو الإستفتاء أغلبية نعم هيحصل كذا ولو أغلبية لاء هيحصل كذا ... أهم حاجة هى التوعية ... سيبك بقى الناس تقول نعم أو لاء دى مش قصتك إنته ولا لعبتك إنته .,... إنته مجرد واحد مصرى بتوعى غيرك وبتنبه على اللى هيحصل فى كلتا الحالتين الرأى للشعب مش لحضرتك ... حضرتك مجرد نفر ....

مليش دعوة بقى الأخوان موافقين وواحد يقول دا الأخوان بتوع مصلحتهم وعايزين يمسكوا الحكم وواحد يقولى أصل البرادعى بيقول ومبيقولش .... فى كل الحالات يا صديقى الطيب ...دا رأى الشعب ... فهمهم ووعيهم وبس ... بمعنى آخر إعمل الخير وإرميه فى البحر

التغيير الأساسى اللى بنقابله دلوقتى هو التوعية السياسية وتوعية كل شخص بحقوقه وواجباته وإيه المترتب على قرارته وأفعاله سواء نزل مظاهرة عشان المرتب يزيد أو عشان حتى الشركة تجيبله أتوبيس ينقله لحد الشغل أو قال نعم أو لاء فى التعديلات ...الناس لازم تفهم وتعرف الحقيقة وبس

وبعدين سيبهم يختاروا ... وعلى رأى عمنا جاهين كان بيقول : لاتجبر إبن آدم ولا تخيره يكفيه ما فيه من عقله بيحيره

الشعب المصرى إشترى حريته وبقى بيعرف يقول آه ولاء ... ولكن للأسف نسى يأخد الكتالوج بتاعها معاه ... فعمال يلعب فى الزراير ويضغط هنا وهناك وميت رأى وميت كلمة

كل واحد يقرأ كويس ويشوف هوا هيقول لاء أو نعم وينزل من بيته ويروح يشوف.. هل فعلا قدرنا بثورتنا نغير التزوير اللى بيحصل ؟؟؟

هل فعلا خلاص بقينا بلاد الحرية ؟؟؟؟

مش هتكلم كتير ... لكن هقولكم إن المهم والأهم حاليا هوا إن كل واحد فينا ينزل من بيته ....ويروح يشوف الإستفتاء ويقول رأيه

وقبل ما يقول رأيه يسأل كويس ويقرأ ويحاول يقيم الموضوع بشكل سليم

وفى كلتا الحالتين ...

الدستور الحالى الموقوف سواء إتقال نعم ففى بند إتضاف بخصوص إنشاء دستور جديد

و لو إتقال لاء ... فهيكون فى إعلان دستورى ومحاولة إنشاء دستور جديد

يعنى فى كلتا الحالتين فى دستور جديد .... بلاش إستفزاز بقى

هلاقى واحد جاى يقولى : أصل ممكن يا فقرى الريس الجديد يكون شخص وحش وشرير ومش يعملنا دستور جديد أو يعك لنا الدنيا ؟؟؟

أو واحد يقولى أصل الإنتخابات البرلمانية هيتدخل فيها الحزب الوطنى

هيكون ردى الوحيد عليه هى الصورة اللى فوق دى ... إفتكر كويس الناس اللى نزلت وقلعت الجزم ورفعتها فى وش مبارك يوم الخطاب ووقفت فى وش الموت وطالبت بحريتها مرة ... الناس دى مش هتسكت وأنا أولهم فى أى حالة من دول .... وطبعا مش محتاجين ننوه وننبه إن خلاص الجماعة الحلوين بتوع الوطنى هياخدوا بال.... لو حاولوا يدخلوا الإنتخابات ولو شخصية عامة هتأخد على دماغها وتخاف من تشويه سمعتها .. وميدان التحرير موجود وديتها جنيه مترو وأبقى أنا وإنته هناك ونشيل روحنا على كفوفنا من تانى ... مش كدا ولا إيه ؟؟؟

وعشان خاطرى عشان خاطرى عشان خاطرى .... بطلوا تلعبوا فى زراير الحرية وإقروا الكتالوج

وإقروا كل وجهات النظر وخدوا قرار

                                 والأهم تنزلوا الإستفتاء على كل حال

محدش بيموووووووت ناقص حلم

الى شباب مصر المتمسكين بمبارك اليكم التالى : والكلام..

إلى روح بائع الخضار الشاب الذي أقال رئيس دولة عربية "تونس" لأول مرة في التاريخ بإرادة الشعب..
إلى ذلك المـُنتـَحـِر الذي لا يهمني إن كان اِنتحاره سـَيـُلقـِي به إلى الجنة أو النار.. لكن الأكيد أنه أدخل وطنه إلى الجنة الحقيقية.. جنة الحرية!

                            ...................................................................................................

هل ينكر كفيف أن ملايين المصريين كذلك؟؟
هل شاهدت خريج هندسة يعمل في محطة بنزين؟؟
خريج اقتصاد وعلوم سياسية يقف في كشك لتصوير الأوراق؟؟
خريجي تجارة وحقوق يبيعون الفلافل؟؟

كم مرة شاهدت بائعي الخضروات وهم يهرولون أمام عسكر البلدية من أجل الاستيلاء على مصادر رزقهم الضعيفة (قفة طماطم, قفص خيار, صفيحة جبن قريش, قفص فطير مشلتت أو بيض) في أي من الأسواق المصرية لأنهم يحجزون الأرصفة التي لا يسير عليها أحد؟؟؟
كم مرة شاهدت شباب وسط البلد وهم ينادون بعض بالصافرات أن يركضوا سريعاً من قبل أن تأتيهم شرطة البلدية لتصادر بعض الملابس أو الأحزمة أو الأحذية التي يفترشونها على الرصيف؟؟؟
حتى تأتي الشرطة وتغتنم ما تريد.. ويسرق العسكر ما يبتغون من بضائع الشباب..

كم مرة شاهدت تسجيلاً لصفعات تدوي فوق أقفية الموطنين في أقسام الشرطة المصرية؟؟
كم مرة شاهدت ما هو ألعن من ذلك؟؟
ظابط يتحرش بفتيات ويضربهن؟؟
ظابط بمساعدة كلابه يهتكون عرض سائق مكروباص؟؟
ظابط لا يستريح لمنظر لشاب يبدو عليه انه "ابن ناس" زيادة عن اللزوم, وزوجته فاتنة.. فيقوم باحتجازه لتعذيبه بنزع شعر عانته وهتك عرضه؟؟
مخبر داخلية يقتل شاباً قرب بيته والمتهم يتحول إلى لفافة بانجو؟

كيف ستنظر أيها الشاب المصري –الذي في يدك التغيير والمستقبل- إلى هذا الشاب؟؟
هل هو ضحية ظلم يجب أن تصرخ من أجله بكل ما أوتيت من قوة؟؟
أم أنه مجرد كافر لأنه مات منتحراً ولا يستحق التـَرَّحـُم عليه أو الثورة من أجله؟؟
أم أنك معتدل فستكتفي بالدعاء؟؟ الدعاء له بالرحمة, والدعاء على من ظلمه؟؟ ولا تطالب بأكثر من هذا وذاك؟؟
وبارك الله في الإيمان حين يقترن بالخوف..

هل يرى أي مواطن مصري نفسه مكان الآخر؟؟
هل الغني يرى نفسه مكان الفقير أم كل ما يفكر فيه هو الاِحتكار وكيفية سرقته أكثر وأكثر..؟؟
هل الفقير يرى نفسه مكان الفقير الآخر؟؟ أم أصبحنا نستمتع بالفهلوة وسرقة الملاليم من بعضنا البعض وتركنا كبار اللصوص يتابعون مسرحيتنا باستمتاع وكل شيء يصب في النهاية إلى جيوبهم؟؟؟
هل المسلم يرى نفسه مكان المسيحي؟؟ هل يرى شخصيته هو –نفسه-؟؟ وأن مدى اِرتباطه بأسرته ومجتمعه لا يتيح له حرية التفكير في أن يغير من دينه كما يطلب من المسيحي أن يفعل بكل سذاجة (والعكس صحيح)؟؟؟
هل يفكر كل مصري أنه وجد دينه بالوراثة وبقي عليه معتقداً أنه الصحيح بالاستعانة بالتبريرات الجهنمية, وأن ماعداه باطل ونسي شيء اِسمه وطن؟؟

متى يمكن أن تشعر كمواطن مصري بالحماسة والفخر بعيداً عن صياحك حين تتذوقها بعد أن يحرز الفريق القومي هدفاً؟؟؟
هل أنت على استعداد للموت في سبيل وطنك؟؟
هل ترى سؤالي السابق مضحك؟؟
ماذا تعني إليك مصر؟؟
هل هو سؤال ساخر سخيف؟؟
هل تعيش بمبدأ "تولع البلد.. والشباب الثوار .. بس أنا أعيش"؟؟
هل تؤمن أنك في مصر تعيش أصلاً؟؟
هل تراها حياة مطمئنة التي تعيشها في مناخ ملوث, تحت رحمة غلاء قاسٍ, وبين نفوس مريضة؟؟
هل تريد أن تعيش ميتاً كفأر وضيع لمائة عام؟؟
أم تموت صقراً مخلداً في ريعان شبابك؟؟

متى يمكن أن تثور وتتوقف عن (الكسكسة) لصالح الرئيس وابنه القادم؟؟
متى سيخرج المثقفون عن رضا الحكومة؟
متى يمكن أن تتحد المعارضة جميعها ضد الرئيس لمصلحة مصر دون الحاجة لتلميع أو اِستعراض لأحد الطامعين في الحكم كما هو الحال حاليا لإئتلاف احزاب المعارضة؟؟
(بدل الصراخ الغير مجدٍ "دول جابولي أزمة قلبية, وشـَهروا بيا, وحياة عينيا" أو "رايحة فين يا فاطمة؟؟ رايح ألم توقيعات"!

(مصر دولة منتصبة فعلاً.. لكنها للأسف مصابة بسرعة في القذف!)
فكم مرة قلنا أن هذه ستكون بداية نهاية النظام.. فتكون النتيجة ضجيج بلا طحن؟!

ولكنا هذه المرة نهاية النهاية من النظام 
هل شعرت بهذا منذ أن بدأ "علاء الأسواني" و"عبدالحليم قنديل" كتابة مقالات نارية في 2004 عن الرئيس مباشرة لأول مرة بدلاً من صب جام الغضب كله على رئيس الحكومة؟؟!
(البداية كانت في 2004.. في العام الثالث والعشرون من حكم الرئيس مبارك.. وهي عدد سنوات حكم الرئيس التونسي حتى ثار عليه الشعب بلا توقف)
أم لعلك شعرت بهذا حين استكمل المسيرة بعدهما اِبراهيم عيسى وفريقه بالإصدار الثاني للدستور في 2005 مع ظهور حركة كفاية؟؟
أم قلنا أن النهاية ستحدث مع الاعتقالات والتحكم الأمني ووفاة معتقلي السجون من فرط التعذيب؟؟
هل صرخت حزناً من أجل غرق 1200 مصري نتيجة إهمال وقذارة نظام متآكل أم صرخت فرحاً لأن مصر أخذت كأس الأمم الإفريقية بعد تلك الكارثة بأيام؟؟
تتوالى أحداث الفتن الطائفية وتزوير الانتخابات.. ولا يحدث شيئاً.. يموت "خالد سعيد" على أيدي الداخلية.. فيشترك نصف مليون مصري في صفحات تضامن معه على "فيسبوك" ولا تجد عـُشر عـُشر هذا العدد في الشارع.. ولا يحدث شيئاً.. ولا حتى إقالة وزير الداخلية؟؟
كم مرة شاهدت مظاهرة مصرية ساخنة وتوقعت أن تكون تلك هي النهاية.. فلا يحدث شيئاً؟؟؟
كم مرة شاهدت مظاهرة مصرية تحت إشراف الأمن المبتسم في رضا وسعادة.. تحت شعار "اصرخلك صرختين وروح بيتكم"؟؟؟

كم مرة سمعت عن انتحار مصري بسبب الفقر؟؟
كم حادثة اِنتحار حدثت في مصر "مبارك" بسبب الفقر وقامت جرائد الحكومة بتحويلها إلى قصص اِنتحار بسبب حب؟؟
هل سمعت عن موظف الخارجية الذي أقالوه لأنه "غير لائق اجتماعياً" لمجرد أن والده فلاح.. وبعدها انتحر ولم يثور أحد مطلقاً؟؟؟

متى تحدث الثورة؟؟
أنت لن تثور إلا حين يضربك أحد على قفاك!
وهل لم تشعر كمواطن مصري بأنك تـُصفع يومياً على قفاك؟؟

هل أنت من الذين يـُخـَدَّرون سياسياً حين يسألوك: كيف ولماذا تثور ضد النظام وليس لديك البديل؟؟
هل تبرر استسلامك للوضع القايم بسبب "أصل مافيش حد مناسب بدل مبارك" أو "اللي نعرفه أحسن م اللي نعرفوش"؟؟
هل من الخطأ أن تهدم الخطأ الواضح حتى ولو لم يكن هناك بديل؟؟
هل أنت تجهل أن من أهم معالم فساد النظام القائم هو عدم ظهور بديل مناسب له؟؟؟
هل أنت مؤمن أنه لن يرضى النظام عن بديل إلا لو كان سياسياً معاق ذهنياً يريد أن يأتي بوزارة للطرابيش أو كومبارس أجير؟؟
هل لا تعلم أنه لا يأتي بديل مناسب لــ"مبارك" وإلا قام كلاب إعلامه بتشويهه وتحقيره أمام الرأي العام؟؟

.............................................................................................

الناس المتعاطفة اللى مشاعرها مرهفة سياسيا وقلوبها بتتهز من كلمتين ناعمين ....احب اقولهم  احنا فى ثورة وده ابن كلب مش هيرحمكم زى ما عمره ما رحمنا طول التلاتين سنة اللى فاتو ...الشعب هيجوع زيادة والبلد هتتسرق اكتر  وسياسة العصاية والجزرة

احنا فى الفترة اللى جاية ومع استمرار مطالبنا برحيله بنكسب مش بنخسر مفيش حاجة ممكن نخسرها تانى اكتر من اللى خسرناه فى الاول

ممكن بقى نلعب على المكسب مش التعادل  وممكن بقى  نهاجم وماندافعش  احنا فى موقف قوة وهو فى موقف ذل يا ريت ما نتقسمش حوالين  ناس موافقة وناس لا ........احنا كلنا مطالبنا واحده انه يمشى بقى ويريحنا

ومحدش بيموت ناقص حلم

ليه الحكام بيتعاملوا مع الشعوب على انهم عالم هبلة

هل باراك أوباما هو أسامة بن لادن؟

صدق أو لا تصدق ! باراك أوباما هو أسامة بن لادن،اى ان أوباما و أسامة بن لادن ما هما إلا شخص واحد، فقد تم إنتاج وتحميل فيديو على موقع اليوتيوب، بعنوان "من هو الرئيس أوباما؟ ربما هو أسامة بن لادن". من خلال الفيديو، يتم عمل مقارنة بين تفاصيل وجه كل من أوباما وأسامة بن لادن، بدءا من الفم و العين وشكل الأذن - المميزة للرئيس أوباما- وأخيرا بمطابقة كاملة لوجههما معا،  في محاولة من منتج الفيديو للتأكيد على أن الرئيس أوباما ما هو إلا أسامة بن لادن زعيم تنظيم القاعدة والشخص المطلوب القبض عليه على وجه السرعة من دول العالم.

وينهي منتج الفيديو مقارنته متسائلا "أليس أوباما هو من دعا لإنهاء الحرب في العراق ؟" في محاولة أخري منه لإقناع المشاهد بذلك.

انا بعد ما شفت الفيديو ده وكتبت الكلام ده حسيت انى عبيط ...

بس طلعت بنتيجة ان الحكام بيعاملوا الشعوب على انهم عالم هبلة